ប្រតិបត្តិការទ្រង់ទ្រាយធំ៖ បង្ក្រាបទីតាំង “អនឡាញស្គេម” ៥កន្លែងក្នុងក្រុងសិរីសោភ័ណ ឃាត់ខ្លួនជនបរទេសជាង ២០០នាក់

បន្ទាយមានជ័យ៖ ជាលើកដំបូងនៅក្នុងក្រុងសិរីសោភ័ណ កម្លាំងចម្រុះនៃគណៈបញ្ជាការឯកភាពខេត្តបន្ទាយមានជ័យ បានបើកប្រតិបត្តិការបង្ក្រាបទីតាំងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scam) យ៉ាងសកម្មចំនួន ៥ទីតាំង។

ប្រតិបត្តិការនេះធ្វើឡើងនៅល្ងាចថ្ងៃទី០៣ ខែកក្កដា ឆ្នាំ២០២៦ ស្ថិតក្នុងសង្កាត់កំពង់ស្វាយ និងសង្កាត់ព្រះពន្លា ក្រុងសិរីសោភ័ណខេត្តបន្ទាយមានជ័យ ដឹកនាំដោយគណៈបញ្ជាការឯកភាពខេត្ត សហការជាមួយគណៈបញ្ជាការឯកភាពក្រុង និងមានការសម្របសម្រួលដោយព្រះរាជអាជ្ញារងអមសាលាដំបូងខេត្តបន្ទាយមានជ័យ ដោយមានការចូលរួមពីកម្លាំងនគរបាល និងកងរាជអាវុធហត្ថខេត្ត។

ជាលទ្ធផលសម្រេចបាន៖

• ជនបរទេសដែលត្រូវបានឃាត់ខ្លួន៖ ចំនួន ២០៧នាក់ (ចម្រុះជាតិសាសន៍)។

វត្ថុតាង៖ រឹបអូសបានកុំព្យូទ័រ ទូរស័ព្ទ និងឧបករណ៍បច្ចេកវិទ្យាជាច្រើនគ្រឿងដែលប្រើប្រាស់សម្រាប់ធ្វើសកម្មភាពឆបោក។

ទីតាំងដែលត្រូវបានបង្ក្រាបរួមមាន៖
ក្នុងចំណោម ៥ទីតាំង គឺមាន ៤ទីតាំងមានម្ចាស់ឈ្មោះ សៀង ហៃ (មុខរបរធ្វើម្ហូបការ)៖
១. ផ្ទះចុងភៅ៖ ស្ថិតនៅភូមិចក សង្កាត់ព្រះពន្លា (ឃាត់ខ្លួនជនបរទេស ១៣០នាក់)។
២. ផ្ទះ ២ល្វែង (ក្នុងបុរីចិនខ្មៅ)៖ ស្ថិតនៅភូមិក្បាលស្ពាន សង្កាត់ព្រះពន្លា (ឃាត់ខ្លួន ២៩នាក់)។
៣. ភោជនីយដ្ឋានស៊ុបខ្មងគោ៖ ស្ថិតនៅភូមិកំពង់ស្វាយ សង្កាត់កំពង់ស្វាយ (ឃាត់ខ្លួន ២០នាក់)។
៤. អគារក្បែរបរិវេណខារ៉ាអូខេហ្គោលថោន៖ ស្ថិតនៅភូមិក្បាលស្ពាន សង្កាត់ព្រះពន្លា (ជនសង្ស័យបានរត់គេចខ្លួនមុនកម្លាំងទៅដល់)។
៥. អគារជាប់មាត់ស្ទឹង៖ ស្ថិតនៅភូមិ៣ សង្កាត់ព្រះពន្លា (ឃាត់ខ្លួន ២៨នាក់)។

បច្ចុប្បន្ន ម្ចាស់ទីតាំងឈ្មោះ សៀង ហៃ កំពុងស្ថិតក្រោមការតាមប្រមាញ់របស់សមត្ថកិច្ចដើម្បីយកមកផ្តន្ទាទោសតាមច្បាប់។ ប្រធានគណៈបញ្ជាការឯកភាពខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ក្នុងការបោសសម្អាតទីតាំងអនឡាញស្គេមឱ្យអស់ពីក្រុងសិរីសោភ័ណ និងតាមបណ្តាស្រុកជាប់ព្រំដែន ដោយសារតែក្រុមជនល្មើសទាំងនេះបានគេចពីក្រុងប៉ោយប៉ែតមកលួចលាក់ស្នាក់នៅក្នុងទីតាំងខាងលើ៕